Enskar múffur

Þessi uppskrift kemur úr súrdeigs grúppu á facebook. Þetta eru súrdeigs brauð bollur, english muffins, brauð sem er borðað er með smjöri og áleggi. Sælar minningar úr eldhúsi systur minnar á Nýja Sjálandi að fá ristað english muffin með smjöri og osti með morgunkaffinu. Þessi uppskrift reyndist vera fullkomnun. Ættu að vera ca 24-30 stykki, eftir hvaða stærð þú vilt hafa. Mínar voru milli 90-100g stykkið

Ath. að eins og með flestar súrdeigs uppskriftir gerir þú degið daginn áður en þú bakar. Ég tek súrinn úr ísskáp að morgni og fóðra hann, læt hann standa á borðinu við opinn glugga yfir daginn, og geri svo degið klárt að kvöldi og læt það standa í ísskáp yfir nótt.

• 1,200 g. brauðhveiti (manitoba mjög gott)
• 760 g. mjólk (20-25°C)
• 300 g. súrdeigsmamma, fóðruð og virk
• 80 g. hungang eða sykur
• 22 g. Salt
• 3 egg

Uppskriftin segir að blanda öllu saman í stóra skál. Mér finnst betra að fylgja að einhverju leiti leiðbeiningum sem ég fékk um súrdeigsbakstur og setja mömmuna út í vökvann fyrst og hræra vel saman, því næst setja hunang/sykur, egg, hveiti og leyfa því að standa í 30 mínútur áður en saltinu er hnoðað saman við. Þetta deig er hinsvegar fremur þétt/þurrt þannig að það er smá maus svo allt í góðu að henda saltinu í vökvann áður en hveitinu er blandað í.

Deigið látið standa í 2-4 tíma og á 30-60 mínútna fresta þarf að snúa deiginu til að byggja upp glútenið (stretch and fold - google it).

Deigið sett inn í ísskáp yfir nótt í lokaðri skál (plastfilma yfir).

Daginn eftir er deigið tekið út og skorið í 90-100 gramma búta sem eru mótaðir í bolta, má aðeins fletja þá út með hendinni. Látnir standa við stofuhita í ca 2 tíma undir stykki. Ath hafa vel af hveiti undir, þeir eiga það annars til að límast við borðið.

Ofninn hitaður í 180°C. Panna hituð á meðalhita. Ath hún þarf að ná vel upp hita áður en byrjað er að baka.

Múffurnar bakaðar í ca 4 mínútur á hvorri hlið, mikilvægt að hafa lokið á pönnunni svo þær nái að bakast í gegn. Þetta tekur smá tíma en ef þú ert með stóra pönnu geturðu haft 2-3 á í einu. Raða þeim á bökunarplötu og þegar hún er orðin full skella múffunun inn í ofn í ca 4 mínútur til að þær verði fullbakaðar.

Það er mjög gott að baka slatta og geyma í frysti og nota eftir þörfum. Gott að skera þær í tvennt áður en þær eru frystar svo það verði auðveldara að koma þeim í brauðristina.