Kanilsnúðar (súrdeigs)

Þessi uppskrift er talsverð aðlögun á uppskrift sem var deilt á instagram hjá brauð og co. Sú var með geri en þessi með súr. Deigið er gert deginu áður en þú borðar snúðana þe það stendur ca 24 tíma í ísskáp og þurfa svo að hefast í 2-3 tima á borði áður en þeir fara í ofninn.

• 300 gr vatn (20-25 °C)
• 150 gr súr, fóðraður og sprækur
• 700 gr hveiti
• 110 gr sykur
• 10 gr salt
• 1 lítið egg
• 110 g smjör mjúkt (við stofuhita)
• Flórsykur sem er stráð yfir snúðana

Fylling

• 250 gr sykur
• 200 gr marsipan
• 250 gr smjör mjúkt
• 25-30 gr kanill

Dagur 1

Vatnið sett í hrærivélaskál og súrinn settur út í og blandað saman við. Því næst sykur, egg, salt, smjör og hveiti hnoðað saman við í vélinni í nokkrar mínútur. Látið standa á borði 2 tíma og deginu snúið á 30 mínútna fresti. Því næst sett plast yfir skálina og inn í ísskáp í ca sólarhring. Í lagi að hafa það styttra.

Fyllingin útbúin, hrærivel. Fyrst sykur og marsipan hrært vel saman og smjörinu þvínæst blandað út í smátt og smátt. Siðast er kanil hrært saman við. Fyllingin sett í skál og plast yfir og látin standa við stofuhita þar til snúðarnir eru útbúnir. Hún þarf að vera mjúk svo hægt sé að smyrja yfir degið.

Dagur 2

Degið tekið út úr ísskápnum og flatt út með kökukefli. Útflatt degið ætti að vera uþb 50 cm á breidd og þykktin ca 2mm. Fyllingunni smurt jafnt yfir allt degið. Því næst er deginu rúllað þétt upp og skorið í 12 - 14 snúða. Snúðunum raðað á plötur og endanum á deginu stungið undir hvern snúð. Þrýst aðeins á hvern snúð til að fletja hann smá út. Því næst eru þeir látnir hefast í 2-3 tíma á borði undir plastfilmu.

Ofninn hitaður í 210 gráður á blæstri. Þegar snúðarnir eru búnir að hefast eru þeir smurðir með eggi og flórsykur sigtað yfir hvern snúð. Bakaðir í 10-12 mínútur.