Djöflaterta

Úr Dýrindis tertur og daglegt brauð (Osta og smjörsalan)

• 2 1/4 bolli hveiti
• 1/2 bolli kakó
• 1 1/2 tsk matarsódi
• 1 tsk salt
• 100 g smjör
• 1 bolli sykur
• 1 tsk vanilludropar
• 3 eggjarauður
• 1 1/3 bolli kalt vatn
• 3 eggjahvítur
• 3/4 bolli sykur

Hitið ofninn í 175°C. Hrærið smjör og sykur þar til hræran verður létt og ljós. Bætið eggjarauðunum í einni í senn og hrærið vel á milli. Bætið dropunum í. Blandið saman hveiti, kakói, matarsóda og salti og bætið í smjörhræruna til skiptis við vatnið. Þeytið hvíturnar, bætið 3/4 bolla af sykri í og stífþeytið. Blandið varlega í hræruna með sleikju. Setjið í smurt og hveitistráð klemmuform, 24 cm í þvermál, og bakið í u.þ.b. 60 mín. Kælið. Takið úr forminu og kljúfið í tvennt. Kakan á að vera blaut. Setjið krem á milli og súkkulaðihjúp ofan á.

---

Krem

• 100 g síríus suðusúkkulaði
• 125 g mjúkt smjör
• 2 eggjarauður
• 75 g flórsykur

Bræðið suðusúkkulaðið yfir vatnsbaði og kælið. Hærið smjörið þar til það verður létt og loftkennt (u.þ.b. 10 mín). Bætið eggjarauðunum í, einni í einu og hrærið vel í á milli. Bætið sykrinum út í. Hrærið í u.þ.b. 5 mín. Hærið súkkulaðið saman við smjörkremið. Ef súkkulaðið er of heitt bráðnar smjörið og kremið eyðileggst.

---

Súkkulaðihjúpur

• 100-200 g síríus suðusúkkulaði

Bræðið suðusukkulaðið yfir vatnsbaði og kælið örlítið (samt ekki of mikið það verður að vera aðeins volgt). Súkkulaðið smurt ofan og utan á kökuna með sleikju.